Friday, 21 December 2018

ৰচনা

অই কনপিটৌ, "তই ৰচনা কোনখন লিখিলি"? টিউচন মাষ্টৰ প্ৰদিপে সুধিলে ।
" ছাৰ," মহাত্মা গান্ধী"খন লিখিলো।" কনপিটৌ ৱে যথেষ্ট উৎসাহেৰে ক'লে।

" হৈছে আৰু, তই কি লিখিছ মই গম পাইছোঁ, হব এই ১৫ নম্বৰ বাদ দিয়াই ভাল" প্ৰদীপ মাষ্টৰে প্ৰশ্নকাকতখন লৈ ক'লে।
"এ নহয় ছাৰ, মই ৰচনা ভালকৈয়ে লিখিছোঁ "। কনপিটৌৱে ক'লে
"বাৰু তইনো কি ' মহাত্মা গান্ধীৰ' ৰচনা লিখিলি গাই শুনাছোন " মাষ্টৰে ক' লে।

"শুনক তেতিয়াহলে" বুলি কনপিটৌৱে ৰচনা আৰম্ভ কৰিলে
" মহাত্মা গান্ধী "
১৪৫৯ চনৰ শুক্লা দশমী তিথিত মহাত্মা গান্ধীৰ জন্ম হয়। তেখেতৰ পিতৃৰ নাম 'কুসুম্বৰ গান্ধী' আৰু মাক ইন্দিৰা গান্ধী। সৰুতেই মহাত্মা গান্ধীৰ মাকৰ মৃত্যু হোৱাত, বুঢ়ীমাক খেৰসুতীয়ে তেওঁক গুৰু দ্ৰোণাচাৰ্য্যৰ টোলত নাম লগাই দিয়ে।
মহাত্মা গান্ধীয়ে প্ৰথমতে ভৰিৰ গোৰোহালৈকে লেটিয়াই চুৰিয়া পিন্ধিছিল, কিন্তু এদিন এটা প্ৰকাণ্ড ষাঁড় গৰুৱে খেদা মাৰি আহিল, কোনোমতে মহাত্মা গান্ধীয়ে ষাঁড় গৰুটোৰ শিঙত ধৰি বগৰাই দিয়ে আৰু নিজেও জোঁটপোট খাই পৰে। সেইদিনাৰ পৰাই মহাত্মা গান্ধীয়ে আঁঠুৰ মুৰত চুৰিয়া পিন্ধিবলৈ লয়।
ষাঁড় গৰুটো বগৰাই ভাগৰে জোগৰে আমন জিমনকৈ বেঞ্চ এখনত বহি থাকোতেই মহাত্মা গান্ধীয়ে এটা আপেল সৰি পৰা দেখে আৰু লগে লগে তেওঁ যতৰ আবিষ্কাৰ কৰিলে।

মহাত্মা গান্ধীয়ে ভাৰতৰ পৰা ইংৰাজক বিতাৰণ কৰিবৰ বাবে যথেষ্ট সংগ্ৰাম কৰিব লগা হৈছিল। ইংৰাজৰ লগত সংগ্ৰাম কৰি ১৮২৬ চনত " ইয়াণ্ডাবু" নামৰ ঠাইত সন্ধি" কৰিব লগীয়া হৈছিল। সন্ধিত ইংৰাজে সুধিলে, "তুমি আমাৰ পৰা কেনে ব্যৱহাৰ বিচাৰা"?
মহাত্মা গান্ধীয়ে ক'লে, "ৰজাৰ দৰে"।
মহাত্মা গান্ধীৰ মৃত্যু বৰ কৰুণ আছিল। "লোণ আইন" ভংগ কৰাৰ বাবে এদিন "দণ্ডি - যাত্ৰা"ত ভাগ লৈ মহাত্মা গান্ধী, খোজ কাঢ়ি আহি থাকোতে পিয়াহত অণ্ট - কণ্ঠ শুকাই এটা নিজৰাত পানী খাবলৈ ল' লে। সেই সময়তেই আকৌ ৰজা দশৰথে মৃগয়া কৰিবলৈ গৈছিল। দশৰথৰ হাতত এদাল "শব্দভেদী বাণ" আছিল, ৰজা দশৰথে মহাত্মা গান্ধীয়ে নিজৰাত পানী খাই থকা শব্দটো শুনি ভাবিলে, এইয়া নিশ্চয় কোনোবা মৃগই পানী খোৱাৰ শব্দ। লগে লগে দশৰথে "শব্দভেদী বাণ" এৰে আৰু মহাত্মা গান্ধীৰ ভৰিত লাগি তেখেতৰ "বৈকুণ্ঠ প্ৰয়াণ" হয়।

কনপিটৌ ৰচনা শুনি প্ৰদীপ মাষ্টৰো কোনোমতেহে বৈকুণ্ঠ প্ৰয়াণ হোৱাৰ পৰা ৰক্ষা পৰে 😂😂😂

2 comments:

  1. ভাল লাগিল । আমি এই কৌতুক তো এটা কাহিনী ৰূপত সজাই তুলিব বিচাৰো যদি আপোনাৰ কোনো আপত্তি নাথাকে।

    ReplyDelete
  2. Bhal lagil prothombar Mahatma Gandhi ane jiboni hunilo:-D😂😂

    ReplyDelete